वायरलेस चार्जिंग ः फायद्याचे की तोट्याचे?

स्मार्टफोनच्या जगात सध्या ‌‘वायरलेस चार्जिंग‌’ हे तंत्रज्ञान वेगाने लोकप्रिय होत आहे. केबलची कटकट नसल्यामुळे अनेकजण या सुविधेला पसंती देत आहेत. मात्र, या तंत्रज्ञानामुळे फोनच्या बॅटरीवर विपरीत परिणाम होतो का? हा प्रश्न अनेकांना पडतो. याविषयी…
गेल्या काही वर्षांत वायरलेस चार्जिंगचे तंत्रज्ञान घराघरांत पोहोचले आहे. आता केवळ महागड्या स्मार्टफोनमध्येच नव्हे, तर कारमध्येही हे फीचर मिळू लागले आहे. चार्जिंग पॅडवर फोन ठेवला की तो आपोआप चार्ज होऊ लागतो, ही सोय वापरकर्त्यांना खूपच आकर्षित करते. मात्र, त्याच वेळी बॅटरीच्या आरोग्याबद्दल काही शंकाही उपस्थित केल्या जात आहेत. काही वापरकर्त्यांच्या मते यामुळे बॅटरी लवकर खराब होते, तर काही याला पूर्णपणे सुरक्षित मानतात.
वायरलेस चार्जिंग सुरक्षित आहे का?
तज्ज्ञांच्या मते, वायरलेस चार्जिंग हे एक प्रगत आणि सुरक्षित तंत्रज्ञान आहे. आधुनिक स्मार्टफोनमध्ये ‌‘ॲडव्हान्स बॅटरी मॅनेजमेंट सिस्टिम‌’ दिलेली असते. ही यंत्रणा ओव्हरचार्जिंग, अतिउष्णता आणि विजेचा प्रवाह नियंत्रित करते. त्यामुळे सामान्य वापरात वायरलेस चार्जिंगमुळे बॅटरीचे थेट नुकसान होत नाही. कंपन्या या तंत्रज्ञानाची कठोर चाचणी केल्यानंतरच ते ग्राहकांपर्यंत पोहोचवतात. जर तुम्ही नामांकित ब्रँडचा आणि दर्जेदार चार्जिंग पॅड वापरत असाल, तर बॅटरी खराब होण्याची भीती नसते.
फोन गरम होणे चिंतेची बाब आहे का?
वायरलेस चार्जिंग दरम्यान फोन काही प्रमाणात गरम होऊ शकतो, ही वस्तुस्थिती आहे. यामध्ये विजेचे वहन ‌‘मॅग्नेटिक इंडक्शन‌’द्वारे होते, ज्यामुळे थोडी उष्णता निर्माण होते. कोणत्याही ‌‘लिथियम-आयन‌’ बॅटरीसाठी अतिउष्णता दीर्घकाळात नुकसानकारक ठरू शकते. जर तुम्ही फोन थेट सूर्यप्रकाशात किंवा खूप गरम वातावरणात चार्ज केला किंवा निकृष्ट दर्जाचा चार्जर वापरला, तर बॅटरीच्या आयुष्यावर परिणाम होऊ शकतो. त्यामुळे नेहमी प्रमाणित ॲक्सेसरीज वापरणे आणि फोन थंड जागी चार्ज करणे हिताचे ठरते.
वेग आणि कार्यक्षमता
वायरलेस चार्जिंग हे केबलद्वारे केल्या जाणाऱ्या चार्जिंगपेक्षा थोडे संथ असते. त्यामुळे फोन पूर्ण चार्ज होण्यासाठी जास्त वेळ लागू शकतो. या विलंबाचा बॅटरीवर ताण येतो असे काही जणांना वाटते, पण प्रत्यक्षात योग्य वापर केल्यास ही केवळ एक अफवाच आहे. सुरक्षितता आणि सुविधा यांचा विचार करता वायरलेस चार्जिंग हा एक उत्तम पर्याय आहे.