शेतकऱ्याच्या लेकीची भरारी

जिद्द आणि परिश्रमाच्या जोरावर स्वप्नांना गवसणी कशी घालता येते, याचे ज्वलंत उदाहरण म्हणजे आश्रिता. एका सामान्य शेतकरी कुटुंबात जन्मलेल्या आश्र्तािने आपल्या कष्टाने अशक्य वाटणारी गोष्ट शक्य करून दाखवली आहे. ज्योतिषमती इंजिनिअरिंग कॉलेजमधून बी.टेक. पूर्ण केल्यानंतर तिने आपल्या आवडीच्या हार्डवेअर इंजिनिअरिंग क्षेत्रात करिअर करण्याचा निर्णय घेतला, जो तिच्या अनेक सोबत्यांनी निवडलेल्या वाटेपेक्षा वेगळा होता.
आश्रिताचा हा प्रवास सोपा नव्हता. पहिल्या ‌‘गेट‌’ परीक्षेत तिला 3000 रँक मिळाली, ज्यामुळे नामांकित आयआयटीमध्ये प्रवेश मिळण्याची संधी हुकली. मात्र, या अपयशाने खचून न जाता तिने ‌’रिगा अकॅडमी‌’ या मोफत कोचिंग सेंटरमध्ये प्रवेश घेतला आणि अहोरात्र मेहनत सुरू ठेवली. तिच्या या चिकाटीचे फळ तिला 2022 मध्ये मिळाले, जेव्हा तिने गेट परीक्षेत संपूर्ण भारतात 36 वा क्रमांक पटकावला.
36 वी रँक मिळाल्यामुळे आश्रितासाठी इस्रो आणि डीआरडीओसारख्या प्रतिष्ठित संस्थांचे दरवाजे उघडले होते. मात्र, तिला व्हिएलएसआय क्षेत्रात रस होता. आपल्या आवडीशी प्रामाणिक राहत तिने आयआयटी बेंगळुरू येथे एम.टेक. करण्यासाठी प्रवेश घेतला. उच्च शिक्षणादरम्यान तिने या विषयात नैपुण्य मिळवले, ज्याचा फायदा तिला नोकरीच्या संधीमध्ये झाला.
शिक्षण पूर्ण होताच आश्रिताला जगातील अग्रगण्य तंत्रज्ञान कंपनी ‌‘एनव्हिडिया‌’ कडून तब्बल 52 लाख रुपये वार्षिक पॅकेजची नोकरी मिळाली. तिच्या या यशामुळे केवळ तिचे आयुष्यच बदलले नाही, तर तिच्या कुटुंबाची आणि संपूर्ण समाजाची मान अभिमानाने उंचावली आहे. एका शेतकऱ्याच्या मुलीने शून्यातून विश्व उभे करून आजच्या पिढीसमोर एक नवा आदर्श ठेवला आहे.