हारिका ओडेलाची हृदयस्पर्शी गोष्ट

पालकांसाठी आपल्या मुलांचे यश डोळ्यांनी पाहण्यापेक्षा मोठा आनंद दुसरा कोणताही नसतो. असाच एक भावूक क्षण सध्या समाजमाध्यमांवर सर्वांचे लक्ष वेधून घेत आहे. बेंगळुरू येथील ‌’ॲमेझॉन‌’ कार्यालयात कार्यरत असलेल्या हारिका ओडेला हिने नुकतीच आपल्या आई-वडिलांना आपल्या कामाच्या ठिकाणी नेले. आपल्या लेकीचे कॉर्पोरेट जगातील यश आणि तिचे कार्यालय पाहून या पालकांच्या चेहऱ्यावर जो अभिमान आणि आनंद झळकला, त्याने इंटरनेटवरील लाखो लोकांची मने जिंकली आहेत.
हारिकाने शेअर केलेल्या या क्षणांमध्ये तिचे आई-वडील ‌’ॲमेझॉन‌’च्या भव्य कार्यालयाला भेट देताना अत्यंत आनंदी दिसत आहेत. एका मध्यमवर्गीय कुटुंबासाठी हे केवळ एका कार्यालयाची भेट नसून, अनेक वर्षांच्या कष्टांचे, त्यागाचे आणि स्वप्नपूर्तीचे प्रतीक आहे. हारिकाच्या या कृतीने हे पुन्हा एकदा अधोरेखित केले आहे की, जेव्हा मुले आयुष्यात काहीतरी मोठे साध्य करतात, तेव्हा पालकांच्या कष्टांचे चीज होते. ही सुंदर घटना सध्या इंटरनेटवर मोठ्या प्रमाणावर शेअर केली जात आहे. प्रत्येक मध्यमवर्गीय कुटुंबाचे हेच स्वप्न असते, अशा शब्दांत नेटकरी यावर आपल्या प्रतिक्रिया नोंदवत आहेत. हारिका आणि तिच्या पालकांचा हा फोटो केवळ एका कुटुंबाचा आनंद व्यक्त करत नाही, तर तो हजारो तरुणांना आपल्या पालकांसाठी काहीतरी करून दाखवण्याची प्रेरणा देत आहे.