रजनीकांत यांच्या नावावर नवा विक्रम

सुपरस्टार रजनीकांत यांच्या ‌‘जेलर 2‌’ या चित्रपटाची बॉक्स ऑफिसवरील घोडदौड अजूनही सुरू आहे. रिलीजच्या तिसऱ्या वीकेंडमध्येही चित्रपटाने आपली पकड कायम ठेवली असून, 18 व्या दिवशी जगभरातील कमाईचा 800 कोटी रुपयांचा टप्पा पार केला आहे. या यशासह रजनीकांत यांच्या कारकिर्दीत 800 कोटींचा आकडा गाठणारा हा पहिला चित्रपट ठरला आहे. तसेच, तमिळ चित्रपटसृष्टीतही या चित्रपटाने नवा विक्रम केल्याचा दावा वृत्तांमध्ये करण्यात आला आहे.
रजनीकांत यांचा मोठा चाहतावर्ग आणि चित्रपटाला मिळणारा प्रेक्षकांचा प्रतिसाद यामुळे ‌‘जेलर 2‌’ची कमाई सातत्याने वाढत आहे. चित्रपट प्रदर्शित झाल्यापासून त्याने बॉक्स ऑफिसवर चांगली कामगिरी केली आहे. विशेष म्हणजे, रिलीज होऊन 18 दिवस उलटले असतानाही चित्रपटाची कमाई सुरूच आहे.
सॅकनिल्कच्या सुरुवातीच्या आकडेवारीनुसार, चित्रपटाने 17 दिवसांत जगभरात 790.85 कोटी रुपयांचा व्यवसाय केला होता. त्यानंतर 18 व्या दिवशी 800 कोटी रुपयांचा टप्पा पार केला. त्यामुळे चित्रपटाच्या यशात आणखी एक मोठी भर पडली आहे. मात्र, 18 व्या दिवसाच्या जगभरातील कमाईचे अंतिम आकडे रात्री उशिरापर्यंत जाहीर होणे अपेक्षित होते. त्यामुळे चित्रपटाच्या एकूण कमाईत बदल होण्याची शक्यता आहे.
‌‘जेलर 2‌’ने केवळ परदेशातच नव्हे, तर भारतीय बॉक्स ऑफिसवरही दमदार कामगिरी केली आहे. चित्रपटाच्या कमाईने भारतात 450 कोटी रुपयांचा टप्पा पार केला आहे. चित्रपटाने पहिल्या आठवड्यात 334.35 कोटी रुपयांची कमाई केली होती. तर दुसऱ्या आठवड्यात 95.55 कोटी रुपयांचा व्यवसाय केला. तिसऱ्या आठवड्यातही चित्रपटाला प्रेक्षकांचा प्रतिसाद मिळत असल्याचे आकडेवारीवरून दिसून येते. चित्रपटाने 16 व्या दिवशी 5.50 कोटी रुपये, तर 17 व्या दिवशी 9.35 कोटी रुपयांची कमाई केली. 18 व्या दिवशी रात्री 8.30 वाजेपर्यंत चित्रपटाने 7.90 कोटी रुपये कमावल्याची माहिती समोर आली होती. या आकडेवारीनुसार, चित्रपटाचे भारतातील नेट कलेक्शन 452.65 कोटी रुपयांवर पोहोचले होते. तिसऱ्या वीकेंडमध्येही चित्रपटाची कमाई कायम असल्याने त्याच्या एकूण व्यवसायात आणखी वाढ होण्याची शक्यता आहे.
‌‘जेलर 2‌’चे हे यश रजनीकांत यांच्यासाठी विशेष मानले जात आहे. त्यांच्या कारकिर्दीत जगभरात 800 कोटी रुपयांची कमाई करणारा हा पहिला चित्रपट ठरला आहे. त्यामुळे त्यांच्या स्टारडमची पुन्हा एकदा चर्चा सुरू झाली आहे. – मानसी जोशी

Check Also

राम गोपालचा ‌‘पोलीस कंपनी‌’

अंडरवर्ल्ड आणि गुन्हेगारी विश्वाचे वास्तववादी चित्रण करण्यासाठी ओळखले जाणारे ज्येष्ठ दिग्दर्शक राम गोपाल वर्मा पुन्हा …