टेरेसवरील शेतीपासून 20 एकरांच्या बेरी फार्मपर्यंत

मुंबईच्या केया सालोट यांचा व्यवसायाचा प्रवास वेगळ्या वाटेने जाण्याची प्रेरणा देणारा आहे. लहानपणापासूनच घरातील व्यवसायाचे वातावरण पाहिल्यामुळे उद्योजकतेची ओढ त्यांच्या मनात होती. मात्र, सुरुवातीला त्यांनी कॉर्पोरेट कायदा क्षेत्रात करिअर करण्याचा निर्णय घेतला. कायद्याचे शिक्षण पूर्ण केल्यानंतर भारतातील मोठ्या कायदेविषयक कंपन्यांमध्ये त्यांनी काम केले. काही वर्षांनी स्वतःचा व्यवसाय उभारण्याची इच्छा अधिक तीव्र झाली आणि 2018 मध्ये त्यांनी नोकरीतून ब्रेक घेतला.
मुंबईतील पवई येथील कुटुंबाच्या कार्यालयाच्या गच्चीवर त्यांनी मायक्रोग्रीन्सची शेती सुरू केली. या छोट्याशा प्रयोगात त्यांनी 25 ते 30 प्रकारची मायक्रोग्रीन्स पिकवली. अवघ्या 6 महिन्यांत त्यांना 50 हॉटेल्स आणि विशेष उपाहारगृहांकडून मागणी मिळू लागली. या अनुभवातून उत्पादनाबरोबरच बाजारपेठ, ग्राहकांच्या गरजा आणि विक्री व्यवस्थेचे महत्त्व त्यांना समजले. मात्र, मोठ्या प्रमाणावर शेती करण्याचे त्यांचे स्वप्न कायम होते. नोव्हेंबर 2019 मध्ये केया आणि त्यांचे पती विमल सालोट मेक्सिको आणि युरोपला गेले. तेथे त्यांनी मोठ्या प्रमाणावर ब्लूबेरी आणि रास्पबेरीची शेती पाहिली. या विदेशी फळांची भारतात व्यावसायिक लागवड करण्याची कल्पना त्यांना तेथेच सुचली. जुलै 2020 मध्ये भारतातील हवामानाला अनुकूल अशा पहिल्या रोपांची परदेशातून आयात करण्यात आली. 2021 मध्ये पहिल्या व्यावसायिक उत्पादनाला सुरुवात झाली आणि स्टार बाजारमध्ये त्याची विक्री सुरू झाली.
यानंतर पुण्याजवळील तळेगाव येथे शेतकऱ्यांकडून 20 एकर जमीन भाडेतत्त्वावर घेऊन ‌‘फार्म2फॅम‌’ची सुरुवात झाली. उष्णता आणि पावसापासून पिकांचे संरक्षण करण्यासाठी तुलनेने कमी खर्चाच्या संरक्षित शेती पद्धतीचा वापर करण्यात आला. ब्लूबेरीसाठी कुंड्यांऐवजी विशेष पिशव्यांचा वापर केला जातो, तर रास्पबेरीची वर्षभर लागवड करण्यावर भर दिला जातो. सध्या 13 एकरांवर ब्लूबेरी आणि 7 एकरांवर रास्पबेरीचे उत्पादन घेतले जाते. कंपनीच्या पथकात 75 जण कार्यरत आहेत. नीती आयोगाच्या संकलनानुसार कंपनीची वार्षिक उलाढाल 1.17 कोटी नोंदवली आहे. शेतीकडे केवळ परंपरागत व्यवसाय म्हणून न पाहता तंत्रज्ञान, बाजारपेठ आणि नव्या पिकांची सांगड घातल्यास मोठे व्यावसायिक क्षेत्र उभे राहू शकते, हे त्यांच्या प्रवासातून दिसून येते.