सिनेसृष्टीला ‌‘संजीवनी‌’ देणारा ‌‘धुरंधर‌’

हिंदी चित्रपटसृष्टी गेल्या काही वर्षांमध्ये प्रेक्षकांना चित्रपटगृहापर्यंत खेचून आणण्याच्या आव्हानाचा सामना निकराने करत आहे. जुन्याच सूत्रांवर आधारित चित्रपट आणि थंडावलेला प्रतिसाद यामुळे 2026 च्या आर्थिक वर्षाचा चौथा तिमाही काळ काहीसा चिंतेत होता. अशा परिस्थितीत दिग्दर्शक आदित्य धर यांचा ‌‘धुरंधर 2: द रिव्हेंज‌’ हा चित्रपट प्रदर्शित झाला आणि पहिल्या भागाप्रमाणेच या सिक्वेलनेही सुपरडुपर हिटच्या पलीकडे जाऊन प्रेक्षकांचा प्रतिसाद मिळवला. परिणामी, संपूर्ण चित्रपट उद्योगासाठी नवसंजीवनी देणारी कलाकृती म्हणून या चित्रपटाची नोंद झाली आहे. – सोनम परब
रणवीर सिंगच्या धडाकेबाज अभिनयाने सजलेल्या या स्पाय थ्रिलरने पहिल्याच वीकेंडला जागतिक स्तरावर 761 कोटी रुपयांची अवाढव्य कमाई करून एक नवा इतिहास रचला आहे. हा केवळ एका चित्रपटाचा विजय नसून भारतीय सिनेमाच्या जागतिक ताकदीचे आणि प्रेक्षकांच्या बदलत्या पसंतीचे दर्शन घडवणारा एक महत्त्वाचा टप्पा आहे.
भारतीय बॉक्स ऑफिसवर या चित्रपटाने 466 कोटींची निव्वळ कमाई केली असून ग्रॉस कलेक्शनचा आकडा 550 कोटींच्या पार गेला आहे. विशेष म्हणजे परदेशातील बाजारपेठांनीही या चित्रपटाला भरभरून प्रतिसाद दिला असून तिथून 211 कोटी रुपयांचे योगदान मिळाले आहे. ‌‘धुरंधर 2‌’ ने ‌‘जवान‌’ आणि ‌‘पुष्पा 2‌’ सारख्या दिग्गजांचे विक्रम मोडीत काढत हिंदी सिनेसृष्टीतील सर्वात मोठी ओपनिंग मिळवणारा चित्रपट म्हणून स्वतःचे नाव सुवर्ण अक्षरात कोरले आहे. चित्रपटगृहांबाहेर ‌‘हाऊसफुल‌’च्या पाट्यांचा पाऊस पडत असून बुकमायशो सारख्या प्लॅटफॉर्मवर एका तासाला 1 लाख 9 हजार तिकिटांची विक्री होणे ही भारतीय सिनेसृष्टीसाठी अभूतपूर्व घटना आहे. ॲडव्हान्स बुकिंगमध्ये या चित्रपटाने 38.77 कोटींची कमाई करून ‌‘ॲनिमल‌’ आणि ‌‘बाहुबली 2‌’ चे विक्रमही मागे टाकले आहेत.
या चित्रपटाचे सर्वात मोठे यश म्हणजे त्याने चित्रपट उद्योगात निर्माण केलेले विश्वासाचे वातावरण होय. गेल्या काही काळापासून मोठ्या बजेटचे चित्रपट बॉक्स ऑफिसवर आपटत असताना ‌‘धुरंधर 2‌’ ने दाखवून दिले की जर आशय तगडा असेल आणि सादरीकरण भव्य असेल तर प्रेक्षक मोठ्या संख्येने चित्रपटगृहाकडे धाव घेतात. पीव्हीआर आयनॉक्ससारख्या मल्टिप्लेक्स साखळीसाठी हा चित्रपट एक वरदान ठरला असून यामुळे प्रेक्षकांची पावले पुन्हा एकदा मोठ्या पडद्याकडे वळली आहेत. तज्ज्ञांच्या मते हा चित्रपट घरगुती बाजारपेठेत 1100 ते 1300 कोटी रुपयांची कमाई करू शकतो आणि जर असे झाले तर 1000 कोटींचा आकडा पार करणारा हा पहिला मूळ हिंदी चित्रपट ठरेल. या चित्रपटाने मंदीच्या सावटात असलेल्या बॉलिवूडला नवी उभारी दिली आहे.
जागतिक नकाशावरही या चित्रपटाने भारतीय सिनेमाचा डंका वाजवला आहे. उरुग्वे, युक्रेन, बल्गेरिया, रोमानिया, चिली, मेक्सिको आणि सायप्रस यांसारख्या बिगर-पारंपारिक बाजारपेठांमध्येही या चित्रपटाने प्रवेश केला आहे. ही बाब भारतीय सिनेमाच्या वाढत्या जागतिक विस्ताराचे प्रतीक आहे. आंतरराष्ट्रीय स्तरावर या चित्रपटाने पहिल्याच दिवशी 9.5 दशलक्ष डॉलर्सची कमाई करून बॉलिवूडचा आजवरचा सर्वात मोठा परदेशी ओपनिंगचा विक्रम आपल्या नावावर केला आहे. शनिवारी तर या चित्रपटाने परदेशात एका दिवसात सर्वाधिक कमाई करण्याचा नवा विक्रम प्रस्थापित केला. आदित्य धर आणि रणवीर सिंग या जोडीने पहिल्या भागाच्या यशानंतर प्रेक्षकांच्या अपेक्षांचे ओझे कमी न होऊ देता ‌‘धुरंधर 2‌’ मध्ये अधिक भव्यता आणि थरार आणला आहे.
या चित्रपटाच्या यशामुळे चित्रपट निर्मात्यांमध्ये आता अधिक धाडसी आणि नियोजनबद्ध चित्रपट बनवण्याचा आत्मविश्वास निर्माण झाला आहे. केवळ एक हिट म्हणून नव्हे तर चित्रपट उद्योगाला सावरणारा आधारस्तंभ म्हणून या चित्रपटाकडे पाहिले जात आहे. चालू आर्थिक वर्षातील थंडावलेल्या व्यवसायाला या चित्रपटाने जी गती दिली आहे त्याचे फायदे पुढील आर्थिक वर्षाच्या पहिल्या तिमाहीपर्यंत दिसून येतील अशी चिन्हे आहेत. चित्रपट उद्योगाला सध्या अशाच एका मोठ्या धक्क्याची गरज होती जो ‌‘धुरंधर 2‌’ ने हमजाच्या बदल्याच्या रूपाने पूर्ण केला आहे. भारतीय सिनेमाचा हा सुवर्णकाळ असून या चित्रपटाने सेट केलेले हे नवे निकष भविष्यातील चित्रपट निर्मितीसाठी एक मोठी प्रेरणा आणि दिशा ठरणार आहेत यात शंका नाही.
‌‘धुरंधर 2: द रिव्हेंज‌’च्या या अफाट यशाचे सर्वात महत्त्वाचे गमक म्हणजे चित्रपटाचा वेगवान आणि खिळवून ठेवणारा स्क्रिनप्ले हे आहे. दिग्दर्शक आदित्य धर यांनी केवळ ॲक्शन दृश्यांवर भर न देता, कथेतील भावनिक गुंतवणूक आणि ‌‘स्पाय युनिव्हर्स‌’चा विस्तार अत्यंत कल्पकतेने केला आहे. रणवीर सिंगने साकारलेली हमजा ही व्यक्तिरेखा प्रेक्षकांना कमालीची भावली असून, त्याच्या अभिनयातील ऊर्जा आणि संवादफेकीने चित्रपटगृहात शिट्ट्या आणि टाळ्यांचा कडकडाट मिळवला आहे. पहिल्या भागाचा असलेला प्रचंड मोठा चाहता वर्ग आणि त्यानंतर निर्माण झालेली उत्सुकता यामुळे प्रदर्शनापूर्वीच या चित्रपटाने प्रेक्षकांच्या मनात घर केले होते. याचा थेट परिणाम पहिल्या दिवशीच्या विक्रमी कमाईत दिसून आला.
दुसरी महत्त्वाची बाब म्हणजे या चित्रपटाचे जागतिक वितरण आणि विपणन धोरण अत्यंत अचूक ठरले आहे. जिओ स्टुडिओजने केवळ भारतापुरते मर्यादित न राहता उरुग्वे, चिली आणि मेक्सिको सारख्या अपारंपरिक देशांमध्येही चित्रपट प्रदर्शित करून भारतीय सिनेमाची व्याप्ती वाढवली. अत्याधुनिक तंत्रज्ञान, दर्जेदार व्हीएफएक्स आणि जागतिक दर्जाचे पार्श्वसंगीत यामुळे हा चित्रपट केवळ बॉलीवूडचा न वाटता आंतरराष्ट्रीय स्तरावरील एक तगडा ॲक्शन चित्रपट वाटतो. यामुळेच केवळ मराठी किंवा हिंदी भाषिक प्रेक्षकच नव्हे, तर दाक्षिणात्य आणि परदेशी प्रेक्षकांनीही या चित्रपटाला पसंती दर्शवली असून, ‌‘धुरंधर 2‌’ ने खऱ्या अर्थाने भारतीय चित्रपटसृष्टीला जागतिक नकाशावर एक नवा मानबिंदू मिळवून दिला आहे.