ब्लाऊजच्या आकर्षक बाह्या

महागडी, आकर्षक कलाकुसर असणारी, नक्षीदार, चांगले फॅब्रिक असणारी साडी घेताना त्यासोबतचा ब्लाऊजही त्याला साजेसा आणि फॅशनेबल असणे गरजेचे असते. अन्यथा साडीचे सौंदर्य आणि एकूण गेटअप फिका पडतो. याउलट ब्लाउजची रचना स्टायलिश असेल तर अगदी साधी साडीसुद्धा खुलून जाते. ब्लाउजमध्ये सर्वात महत्त्वाची गोष्ट म्हणजे नेक आणि स्लीव्हजची रचना. ब्लाउजचे हे दोन्ही घटक जर नीट विचार करून डिझाईन केले असतील, तर स्वस्तातली, साधी साडीसुद्धा डिझायनरसारखी दिसू लागते. क्रिस-क्रॉस ः साधे पण सुंदर स्लीव्ह डिझाईन शोधत असाल, तर क्रिस-क्रॉस पॅटर्न तुमच्यासाठी योग्य ठरू शकतो. यामुळे तुमच्या ब्लाऊजच्या बाह्यांना खूप सुंदर लुक मिळेल. हा पॅटर्न दिसायला इतका आकर्षक आहे की सगळ्यांचे लक्ष खेचून घेतो. पफ स्लीव्हज ः कोणत्याही खास प्रसंगी नेसण्यासाठी सिल्कच्या साड्यांसारखा दुसरा पर्याय नाही. भारी सिल्क साडी परिधान करताना या साड्यांवर पफ स्लीव्हज असलेल्या डिझाईन्सचे ब्लाऊज खूप सुंदर दिसतात. यामुळे सिल्कच्या साड्यांचा रॉयल आणि विंटेज लुक आणखी वाढतो. ब्लाउजला स्पेशल लुक देण्यासाठी तुम्ही बो शेप स्लीव्हज डिझाईन स्टिच करू शकता. हे देखील खूप ट्रेंडी आणि सुंदर दिसते. खासकरून तुमच्या भरजारी साड्यांसाठी बो शेप ब्लाउज डिझाइन परिपूर्ण लूक देईल. स्टायलिश लुक हवा असेल तर फ्रिल शेप ब्लाउज डिझाईन स्टिच करून घेऊ शकता. हे स्लीव्हज चमकदार आणि हलक्या वजनाच्या साड्यांसाठी परफेक्ट ठरतात. अनेक वेळा ब्लाउजच्या फॅब्रिकवर जरी वर्कची बॉर्डर असते. अशा बॉर्डर विशेषतः सिल्क साड्यांमध्ये आढळतात. अशा परिस्थितीत, ब्लाउजमध्ये या सीमा कशा हायलाइट करायच्या याबाबत टेलरचा सल्ला घेऊन आकर्षक डिझाईन बनवता येईल. रेशमी जरीच्या बॉर्डरच्या साहाय्याने स्वीटहार्ट नेकलाईनही बनवता येईल.