कचऱ्यातून संधी शोधणारा उद्योजक

बंगळुरूमधील उद्योजक वैभव अनंत यांनी प्लास्टिकच्या वाढत्या वापराकडे केवळ पर्यावरणीय संकट म्हणून पाहिले नाही, तर त्यामध्ये नव्या व्यवसायाची संधीही शोधली. एकदाच वापरल्या जाणाऱ्या प्लास्टिकमुळे वाढणारा कचरा आणि त्याचे पर्यावरणावर होणारे गंभीर परिणाम लक्षात घेऊन त्यांनी पर्यावरणपूरक पॅकेजिंग क्षेत्रात काम करण्याचा निर्णय घेतला. त्यातूनच ‌‘बॅम्ब्र्यू‌’ या कंपनीची सुरुवात झाली. ‌‘बॅम्ब्र्यू‌’मध्ये बांबू, लाकडाचा लगदा आणि नैसर्गिक तंतू यांसारख्या साहित्याचा वापर करून जैवविघटनशील तसेच कंपोस्ट होणारे पॅकेजिंग तयार केले जाते. प्लास्टिकच्या पारंपरिक पॅकेजिंगला व्यवहार्य पर्याय उपलब्ध करून देणे हा या उपक्रमाचा केंद्रबिंदू आहे. त्यामुळे कंपन्यांना पर्यावरणपूरक पॅकेजिंग स्वीकारता येते आणि प्लास्टिक कचऱ्याचे प्रमाण कमी करण्यासही हातभार लागतो.
ई-वाणिज्य, दैनंदिन वापरातील वस्तूंचे उद्योग आणि विविध उत्पादन क्षेत्रांमध्ये पॅकेजिंगला मोठी मागणी आहे. मात्र, पर्यावरणाबाबत ग्राहकांची जाणीव वाढत असताना कंपन्यांवरही शाश्वत पर्याय स्वीकारण्याचा दबाव वाढत आहे. हीच बदलती गरज वैभव अनंत यांनी ओळखली आणि पर्यावरणसंवर्धनाला व्यवसायाच्या संधीशी जोडले.
पर्यावरणीय समस्या सोडवण्याच्या उद्देशाने सुरू झालेला हा उपक्रम आता मोठ्या व्यवसायात रूपांतरित झाला आहे. उपलब्ध माहितीनुसार, ‌‘बॅम्ब्र्यू‌’ने सुमारे 50 कोटी रुपयांच्या वार्षिक महसुलाचा टप्पा गाठला आहे. हा प्रवास केवळ एका कंपनीच्या यशाची कथा नाही, तर समस्यांकडे नव्या दृष्टिकोनातून पाहण्याचा धडा आहे. आज भारतात पर्यावरणपूरक उत्पादनांची मागणी वेगाने वाढत आहे. त्यामुळे भविष्यातील उद्योजकतेचे स्वरूप केवळ नफ्यावर आधारित न राहता समाज आणि पर्यावरणासमोरील प्रश्नांवर उपाय शोधणारे असेल. समस्या मोठी असेल, तर तिच्यात संधीही मोठी असते, हे वैभव अनंत यांच्या प्रवासातून स्पष्ट होते.