पैशाचा पाऊस!

डेट्रॉईट शहराचे आकाश त्या दिवशी वेगळेच दिसत होते. संपूर्ण ईस्टसाईडवर एक वेगळा आनंद दरवळत होता ‡ धुयाने भरलेल्या आभाळातून अचानकच काहीतरी शुभ्र व सुवर्ण झेपावत खाली येऊ लागलं. गुलाबाच्या पाकळ्यांमध्ये मिसळलेले ते झळाळते हिरवे नोटांचे तुकडे… जणू काही स्वर्गातूनच आलेली एखादी भेट होती.
लोक एकमेकांकडे पाहू लागले, काहींनी डोळे विस्फारले, काहींनी आकाशाकडे हात उचलले आणि काहींच्या डोळ्यांत पाणी आलं. कारण ही फक्त एक ‘सरप्राइज स्टंट’ नव्हती — हे होतं एक शेवटचं प्रेमळ स्मरण, एका माणसाचं, ज्याने आपलं संपूर्ण आयुष्य दुसर्‍यांसाठी जगून दाखवलं.
डॅरेल थॉमस ‡ तो कुणासाठी केवळ एक कार वॉशचा मालक होता, कुणासाठी समाजसेवक, कुणासाठी मित्र, आणि आपल्या मुलांसाठी एक प्रेरणादायक पिता. त्यांच्या निधनानंतर त्यांचं शरीर मातीत गेलं, पण त्यांचं प्रेम अजूनही आकाशातून झरत होतं — अक्षरश:.
२७ जून रोजी, त्यांच्या कबरीवरून उडणार्‍या हेलिकॉप्टरमधून त्यांच्या मुलांनी एक आगळीवेगळी श्रद्धांजली दिली. पाच हजार डॉलर्सची कॅश ‡ म्हणजे जवळपास साडेचार लाख रुपये ‡ आणि शेकडो गुलाबाच्या पाकळ्या, आकाशातून लोकांवर बरसवल्या गेल्या.
डॅडनं आम्हाला नेहमी शिकवलं की, जेवढं मिळालं त्यात समाधान मानू नका — त्यातलं काही तरी द्यायला शिका, असं मोठ्या अभिमानाने त्यांच्या मुलाने सांगितलं. ते दृश्य काहींना स्वप्नासारखं वाटलं. गरीब मुलांनी जमिनीवरून नोटा उचलल्या, एका वृद्धाने स्वतःची काठी बाजूला ठेवली आणि आकाशाकडे पाहून शांत हसला. हे त्या माणसाचं प्रेम आहे… ज्याचं आपण कधीच देणं लागतो, असं तो म्हणाला.
परंतु सर्व काही एवढ्यापुरतंच थांबले नाही. सोशल मीडियावर या घटनेचे व्हिडीओ व्हायरल होऊ लागले. कुणी म्हणालं, ही अमेरिकन लोकशाहीची खरी ताकद, तर कुणी म्हणालं, हा एक बेफाम प्रकार आहे. पोलिसांनी काही विचारले नाही, पण फेडरल एव्हिएशन प्रशासनाला मात्र यात रस वाटला. पण डॅरेलच्या मुलांना त्याची फिकीर नव्हती. त्यांच्या डोळ्यांत पाणी होतं, पण मनात शांतता. कारण त्यांनी त्यांच्या वडिलांच्या शिकवणुकीला न्याय दिला होता.